Tinan 15 Referendum 30 Augustu 1999:
Hadi'a Administrasaun Eleitoral ho Hamosu Prosperidade
Atu Too Objetivu Self Determination

Joao M. SALDANHA
Fundador, Timor Institute of Development Studies,
Becora, Dili


30 Augustu 2014, ita selebra tinan sanulu resin lima referendum Timor Lorosae. Besik 79% Timor oan sira nebe vota, hili atu hafahe an hosi Indonesia ho sai nasaun independenti. Resultadu prosesu eleitoral nebe administra hosi Nasaun Unida (United Nations) née hamosu oportunidade politiku foun ida ba Timor oan sira atu komesa prosesu hari nasaun foun. Ohin loron Timor Lorosae sai nasaun soberanu ho naran Ofisial Republica Democratica de Timor-Leste (RDTL) koinesidu ho naran Portugues Timor-Leste.

Referendum née hamosu mos episodiu politiku importante ida ba Timor oan tomak. Sira desidi sira nia destinu politiku rasik (self determination) liu hosi kaixa eleitoral iha fatin sira namkari iha Timor laran tomak ho mos iha mundu tomak. Née mak esensi desidi destinu rasik tuir vontade popular.

Iha kontestu nasional nebe demokratiku, desidi destinu rasik liu hosi prosesu eleitoral nebe fair, mos (clean), ho segredu, dok hosi intimidasaun, money politics (sosa votu ho osan ka material), ho nauk votu hosi partidu ida tau fali ba partidu seluk. Katak eleisaun née reflete duni povu nia preferensia ba se se deit (partidu ka individu) maka atu kaer poder. La os eleisaun nebe manipuladu. Prosesu eleisaun iha nasaun RDTL nebe demokratiku sei lao regular too rohan laek. Tanba née se iha eleisaun dahuluk sira nebe lalos, tenki iha esforsu nasional tomak atu hadia nafatin sistema née atu eleisaun sira tuir mai diak liu ho resultadu nebe reflete duni povu nia hakarak tuir konseitu self determination.

Iha kontestu nasaun demokratiku, ita husu relevansia self determination née saida? Relevansia maka povu hili nia lider sira tuir konviksaun rasik tanba sira fiar katak hosi eleisaun sei hamosu lider sira nebe sei servisu makaas atu hadia sira nia moris (prosperidade). Tanba née, esensia self determination maka iha eleisaun regular justu (fair), mos, ho segredu atu hili nai ulun sira atu ajuda hadia sira nia moris (prosperidade) ho halakon kiak.

Artigu ida née diskuti fator eleitoral hanesan instrumentu atu hamosu prosperidade ba povu Timor-Leste hanesan reflesaun ida ba komemorasaun loron istoriku 30 Augustu 1999 mesmu ke Estadu Timor-Leste la fo importansia bot ba loron ida née kompara ho loron selu-seluk. Ita sei taka artigu née ho suggestaun ba reforma iha birokrasia liliu orsamentu estadu atu kontrola destinu dezenvolvimentu nasional ho objetivu hamosu prosperidade ba povu Timor-Leste.


Eleisaun hanesan instrumentu prosesu self determination

Hosi 1999 too 2014, Timor-Leste halao tiha ona eleisaun dala hitu, ne mak Eleisaun Assembleia Konstituente (2001) nebe nakfilak an deit ba Parlamentu Nasional (legislatura dahuluk),  Eleisaun Presidenti (2002, 2007, ho 2012), Eleisaun Suku, ho Eleisaun Parlamentar (2007 ho 2012). Determinante eleisaun nasional sira née mak Eleisaun Parlamentar tanba hosi resultadu Eleisaun Parlamentar maka hahoris Governu atu ukun hodi halao programa ba prosperidade povu nia. Eleisaun Presidensial mesmu ke importante, Presidente iha regime semi-presidensial Timor-Leste sai hanesan simbolu nasional ho garante estabilidade ho soberania nasional deit. La iha kompetensia atu halu programa hadia povu nia moris. Eleisaun ba Xefi Suku sira mos importante, maibe atu hili deit lider komunitariu ho kbit limitadu tanba la iha orsamentu rasik liliu reseita suku rasik.

Tempu too ona ba estadu Timor-Leste tetu atu halibur hotu Timor oan sira nebe sai sidadaun ho hakarak sai sidadaun atu tuir eleisaun geral. Too tinan 2012, Timor oan sira nebe tuir eleisaun dala hitu née mak Timor oan sira nebe hela iha Timor laran deit. Maibe sira nebe hela iha liur hanesan Australia, Indonesia, Portugal, Macau, ho rai seluk tan la tuir tanba razaun logistika ho politika. Logistika tanba dehan atu organiza sei han tempu ho orsamentu la too. Maibe fator rua née la os argumentu forte tanba eleisaun regular lolos iha tempo naton atu organiza iha rai laran ho iha liur. Orsamentu mos la os problema tanba estadu Timor-Leste iha osan too ho restu atu involve Timor oan sira iha diaspora partisipa iha eleisaun liliu eleisaun Presidensial ho Eleisaun Parlamentar. Eleisaun Suku la presiza tanba la iha duni suku iha liur mas se hakarak ita mos bele forma komunidade oi oin iha rai liur atu hili sira nia lider lokal sira.

Fator politika maka dominante karik tanba Timor oan sira iha rai liur liliu sira nebe hela iha Indonesia sei vota problematiku liu. Balu keta lakohi tan vota tanba iha opsaun politika seluk ho Lei Indonesia nia nebe la fo dalam ba dupla nasionalidade. Maibe ita bele koko tanba ohin loron deslokasaun Timor oan sira nebe hela iha Timor ba Indonesia mos bot ho sira nebe hela iha Indonesia mai Timor mos bot. La os deit komunidade sira, maibe relasaun bilateral entre Timor ho Indonesia ohin loron diak tebe-tebes iha governu SBY nian ho mos Governu dahuluk sira hanesan Gus Dur ho Megawati Soekarnoputri. Ita mos bele dehan iha Governu Jokowi ninia mos, relasaun Timor-Leste ho Indonesia sei diak nafatin ho sei forti liu tan. Ohin loron, estudante Timor oan iha Indonesia barak liu duke tempu okupasaun Indonesia ho Indonesia sira nebe servisu iha Timor mos barak, menus TNI ho POLRI. Tanba née, tempu too ona atu fo mos oportunidade ba Timor oan sira nebe hela iha rai liur inklui mos sira iha Indonesia atu partisipa iha eleisaun iha Timor-Leste nia bainhira sira hanesan sidadaun Timor nia.

Administrasaun eleitoral tenki rigorozu liu tan. Mesmu ita nia prosesu hetan rekoinesimentu diak hosi rai liur maibe ita hare didiak sei iha aspetu barak mak impata prosesu hamosu eleisaun ida nebe reflete duni self determination née. Eleisaun 2012 husik hela impresaun barak. Iha alegasaun money politics, kaixa votu nebe fila hikas ba iha publiku (la os segredu) atu influensia ema nia votu (pela menus iha Kuluhun, Dili) ho fatin barak tan iha Timor laran tomak tanba razaun sosa votu ka money politics, STAE nebe iha Ministeriu Estatal nia okos nebe hamosu deskonfiansa imparsial ka benefisia ba partidu nebe iha poder, liliu raut votu hosi partidu ida ka rua ka liu nia tau fali ba partidu seluk. Deskonfiansa née bot liu tan bainhira Diretor Geral STAE sai Membru Governu nebe forma depois de eleisaun ramata. Tanba née presiza prosesu eleitoral, administrasaun eleitoral, ho monitorizasaun eleitoral nebe rigorozu liu tan atu hamenus money politics, intimidasaun, ho manipulasaun votu nia. Komisaun Nasional Eleisaun (CNE) halao duni nia knar atu kria kondisaun imparsial ho reforsa tan hosi observador nasional ho internasional sira. Maibe prosesu observasaun sira née la borus ho deskonfiansa parsialidade prosesu eleitoral née mosu nafatin liliu ba STAE.

Ita mos presiza kria kondisaun atu partisipante prosesu eleitoral liliu iha Eleisaun Parlamentar sai hanesan (same level playing field) atu hamosu Parlamentu ho Governu foun nebe reflete duni self determination povu Timor-Leste nia. Aspetu sira née inklui uza birokrasia, media estadu, liliu orsamentu estadu ba benefisia partidu sira nebe iha poder ka iha Parlamentu Nasional deit. CNE iha eleisaun liu ba proibi katak la iha fasilidade estadu inklui kareta uza ba kampaine. Maibe depois de eleisaun ita hatene katak iha ema balu mak uza fasilidade estadu ba duni kampaine eleitoral. Media estadu, liliu TVTL durante kampaine fo duni oportunidade ba partidu ka koligasaun partidu hotu maibe kobertura ba partidu kiik sira liliu sira nebe la representa iha Parlamentu Nasional antes kampaine difisil tebes. Konvite ba sira sempre dehan ema la iha ho tempu la iha mas ba partidu sira nebe iha poder tempu ho ema iha hela deit. Tanba nee kobertura laos tempo eleisaun eleisaun deit mas sira nia konsolidasaun mos hetan nafatin kobertura kompara ho partidu sira nebe la iha representasaun iha Parlamentu Nasional.

Pergunta bot liu mak kriteria orsamentu estadu ba partidu politika sira. Iha Eleisaun Presidensial ho Eleisaun Parlamentar iha subsidiu ba kandidatu sira (Eleisaun Presidensial) ho ba partidu politika ka koligasaun partidu politika sira (Eleisaun Parlamentar) maibe kriteria la klaru ho número ida nebe kiik tebes. Nunee la fo benefisia ba kontestante politika sira atu kompete lolos. Barak mak dehan liliu iha Eleisaun Parlamentar 2012 katak partidu balu simu tiha osan depois la halu kampaine. Barak mak hari partidu atu hetan subsidiu osan Estadu nia deit la os atu kompete duni iha eleisaun. Se iha evidensia hanesan née, partidu ka koligasaun partidu née mak tenki hetan kastigu la os partidu hotu hetan kastigu. Partidu sira nebe hari ho objetivu atu hetan subsidiu osan Estadu deit tenki hetan sansaun tanba hahalok ida née mos halu parte korupsaun tanba uza sala osan Estadu nia ba interese privadu. Tanba née CNE ho STAE presiza fiskaliza didiak prosesu eleitoral atu hahalok korupsaun sira hanesan née lori ba tribunal atu hetan julgamentu. La os kastigu partidu/koligasaun partidu hotu ho subsidiu nebe minimu.

Bainhira ita hare ba iha subvensaun ba partidu sira nebe iha Parlamentu Nasional número née bot tebes ho sae ba bebeik. Iha Orsamentu Estadu 2013, subvensaun née hamutuk tokon nen ($6 juta). Née signifika katak kadeira ida iha Parlamentu Nasional vale ba $92,308. Bainhira Partidu ida iha Parlamentu Nasional iha Deputadu nain sanulu deit, subvensaun ba partidu ida née besik dollar juta ida (ka $923,080) ba tinan ida deit. Tinan 2014, subvensaun née sae ba iha dolar tokon 15 ($15 juta) signifika katak kadeira ida sei vale ba $230,769 (dolar rihun atus rua tolunulu resin). Imagina took partidu ida ho kadeira 30 hanesan CNRT nia subvensaun sei besik tokon hitu ($7 juta ka $6,923,076) ba tinan ida deit (2014). Ita husu ba ita nian aan, kriteria saida maka uza atu fo subvensaun ida nebe makas tebes hanesan née? Desizaun sira née halu tanba deit sira mak iha poder atu halu desizaun. Ita hatene ho komprende katak partidu sira iha Parlamentu Nasional tenki hetan subvensaun tinan-tinan. Maibe subvensaun ida ho número esesivu hanesan née la os ona subvensaun tuir nesesidade maibe atu haforti sira nia an ho hamate partidu sira seluk, liliu sira nebe la iha representasaun iha Parlamentu Nasional. Hare tuir resultadu Eleisaun Parlamentar 2012, Partidu sira nebe la tama iha Parlamentu Nasional ninia votu hamutuk besik 22% total votante (besik 100,000 votu). Ida née mos ho ona manipulasaun oi-oin iha prosesu kontagem votu, liliu iha STAE. Se bele loke fali kaixa votus, ita sei hatene lolos. Ida née atu hatene deit hodi hadia prosesu eleitoral aban bainrua. La os atu influensia fali governasaun agora tanba Eleisaun 2017 besik ona.

Ita fila fali ba iha subvensaun ba partidu sira iha Parlamentu Nasional tenki iha kriteria klaru atu labele hamosu kondisaun sira nebe ita temi iha leten née ka kria kondisaun imbalansu (not the same level playing field) ba partidu ho koligasaun partidu sira. Perigu ida ba esesaun alokasaun orsamentu subvensaun hanesan née atu hamate partidu barak nebe kontraria espiritu Konstitutisaun RDTL nebe fo mahon ba iha multipartidarismu ho demokrasia representasaun proporsional.

Prosperidade Hanesan Objetivu Self Determination

Hamosu prosperidade ka moris diak povu nia hanesan objetivu eternal nasaun demokratiku sira hotu. Nasaun demokratiku hotu buka halu formula oi oin atu kaptura preferensia povu nia liu hosi desain, administrasaun, ho monitorizasuan eleisaun nebe diak atu hamosu resultadu ho  lider sira nebe iha komitment, kompetensia, ho dedikasaun ba moris diak povu nia. Tanba née maka moris diak ka prosperidade sai hanesan objetivu prinsipal nasaun demokratiku sira hotu iha mundu tomak.

Timor-Leste nia eleisaun dala hitu née produs ona resultadu lider sira dominante hosi resistensia. Ida née hanesan faktu real ida ke nasaun foin hari sira tenki simu ho hakuak. Se la iha resistensia la iha nasaun. Adagium ida née universal ba nasaun nebe deit tanba istoria tenki konta, tenki valoriza, ho tenki rekompensa. Tanba née, todan (bobot) hanoin moris diak iha kampaine eleitoral hanesan programa atu hadia povu nia moris seidauk hetan proporsaun naton hodi hili lider sira. Situasaun euforia sai hosi nakukun, sofrimentu, ho atualizasaun an dominante iha prosesu eleitoral iha eleisaun sira liu ba née. Maibe hosi tempu ba tempu, moris nasaun demokratiku nia elementu moris diak (prosperidade) sei hetan proporsaun neneik mas bebeik, ho sai bot iha eleisaun demokratiku sira nebe sei tuir mai. Hosi resultadu Eleisaun Parlamentar 2007 nebe hamosu lider Parlamentu ho Governu nebe dominante hosi resistensia. Karik ida née tanba, Timor-Leste sei atravesa hela krizi politika militar 2006 nebe konsege resolve iha governasaun nebe mosu hosi Eleisaun 2007. Mesmu ke iha difikuldade oi-oin ho polarizasaun nebe makas (Governu versus Opozisaun), Governu Koligasaun tempu neba konsege duni resolve residual Krizi 2006. Istoria sei hakerek bot iha pagina ukun an Timor-Leste nia.

Maibe hosi Governu Koligasaun resultadu Eleisaun 2007, hamosu mos inisiativa foun Ida mak  naran Planu Estrategiku Dezenvolvimentu (PED) 2011 - 2030 ho objetivu atu transforma Timor-Leste ba nasaun ida ho rendimentu mediu aas (upper middle income country) ho povu nebe la iha kiak, eskola hotu, isin diak (saudavel) hotu, instituisaun sira forti, infrastrutura diak, produtividade agrikultura aas, ho setor privadu buras atu kontribui ba loke servisu, industrializasaun, ho diversifikasaun rendimentu la os minarai. Hanoin sira née reflete hanoin ema barak nia, liliu governu nebe iha poder ho ninia asesor sira, inklui mos populasaun iha territoriu tomak, itelektual sira, veteranu, ho mos opozisaun.

PED 2011 - 2030 fo insentivu ho stimulasaun bot ba moris diak (prosperidade) povu Timor-Leste nia. Ita hein katak Governu sira nebe tuir mai, liliu resultadu Eleisaun 2012 bele implementa mehi diak PED liu hosi formasaun Governu kiik maibe kompetenti atu halu agenda maktodan ba realiza mehi ema barak nia mesmu ke resultadu eleitoral tinan neba, besik 22% votante la hili sira (tanba hili partidu sira neb la hetan asentu iha Parlamentu Nasional) ho 30% sai opozisaun iha Parlamentu Nasional. Ema hotu hein, resultadu governu Eleisaun 2012 ho número partidu koligasaun tolu deit dominante hosi partidu ida sei hamosu kompozisaun Governu ida ke forti, kompetenti, ho fokus atu implementa ideal sira PED nia. Tanba lideransa Governu, Parlamentu ho aliansa resultadu Eleisaun 2012 atu hanesan Governu ho Parlamentu anterior maibe ho número koligasaun partidaria kiik (partidu tolu) kompara dahuluk (partidu lima).

Maibe governasaun ida nebe sai mai naksalak los, númeru Governu bot (55), frakturadu, inkompetenti ho esepsaun Membru Governu balu, ho la iha fokus. Governu lakon tempu barak ba kordenasaun ho supervizaun nebe hamosu deit frustasaun. Karik kordenasaun ho supervizaun la biban, Membru Governu balu komesa halu azineira oi oin ho eskandalu sira nebe mosu naba naba hanesan distrasaun bot ida ba governasaun. Mesmu ke servisu balu diak liliu iha nivel internasional hanesan g7+ ho lideransa CPLP, progresu dezenvolvimentu domestiku  lao kudeik hela depois de tinan rua governasaun. At liu tan, asesor ema hosi liliu hosi Pasifiku komesa halimar atu destabiliza sistema ekonomia (liliu estimasaun GDP) aproveita membru governu balu nebe la fokus mesmu ke kaer portfolio estrategiku asuntu domestiku nia maibe lao barak liu iha liur.

Ho situasaun sira née, agenda reforma birokrasia atu sai kompetenti ho base ba meritu, desentralizasun, reforma orsamentu estadu atu efisienti, reforma legislasaun atu promove komersiu, industria ho turismu, hadia konektividade liu hosi infrastrutura dalan, telekomunikasun (fiber optics), hasae kapasidade rekursu humanu hosi edukasaun ho saude, ho hasae produtividade agrikultura ho promove Timor-Leste atu partisipa iha global value chain namlele hotu.

Ikus mai, Xefi Governu desidi atu resigna aan. Depois de diskusaun barak mesmu ke intensaun née la halao, maibe rekoinesimentu katak governasaun lao kudeik mosu nafatin. Ikus liu iha intensaun atu halu remodelasaun deit ba estrutura governu ida ke bot, inkompetenti (ho esepsaun membru balu), ho la iha fokus. Nune bele reset fali fokus ho energia governasaun ida nee. Maibe tempu lao dadauk ona. Oportunidade maka tinan balu 2014 nebe hela née, maibe bainhira hein too tinan oin (2015) maka ema hotu nia atensaun sei fo ba Eleisaun 2017.


Planu, Planu, ho Planu

Saida mak ema hotu hakarak ho Governasaun resultadu Eleisaun 2012 maka remodelasaun. Ne hanesan solusaun temporaria ida. Maibe problema nasional dezenvolvimentu Timor-Leste nia hun maka oinsa traduz mehi sira iha PED 2011 - 2030 ba programa tinan lima-lima, tinan ida-ida ho liga ho orsamentu Estadu tina-tinan. Realidade hatudu katak esforsu PED 2011 - 2030 lao ketak. Halu programa Governu tinan lima nia exercisio ketak ho la liga didiak ba iha PED. Nunes mos planu asaun annual ezersisiu ketak ida tan. Maibe ita nia matan tomak hare ba iha halu orsamentu tinan-tinan. Tanba hosi née valor dolar determina kedas ho reward ba ema sira halu planu mos konkretu duke gasta tempu koalia konaba planu asaun anual, planu governu sa tan PED.

Tanba née bainhira ita hakarak halu remodelasaun ho reset esforsu Governu ida née nia, tenki tau prioridade dahuluk ba planu, prioridade daruak ba planu ho prioridade datolu ba planu.

Nunee importante tebes atu hamosu agensia planeamentu ida nebe fokus ba iha kria ambienti servisu Estadu nia tuir planu. Ita iha rekursu osan barak, ema mesmu ke la barak mas too se ita mobiliza didiak, ho tempu mos iha atu halu reforma sira née. Agensia planeamentu ekonomiku ho nivel ministerial ho suporta politika makas bele kria fundasaun diak ba planeamentu nasional. Tanba ita nia servisu hirak iha tempu barak ba kotuk fokus mak ba orsamentu, orsamentu, orsamentu ho orsamentu. Maibe la iha tempu barak atu dedika iha planu nebe sinkronizadu ho koerenti, atu bele monitor resultadu dezenvolvimentu. Agensia Dezenvolvimentu Nasional (ADN) nebe ita kria hanesan embrio ba Ministeriu Planeamentu née sai fali implementador ida hodi ba buka tuir projetu atu sobu. La os fokus ba iha hadia kualidade planeamentu projetu ho kordenasaun Ministeriu tekniku sira liliu Ministeriu Finansa.

Prioridade ida tan iha reforma birokrasia nia mak reforma estrutura orsamentu estadu. Estrutura orsamentu estadu Timor-Leste nia eransa (warisan) UNTAET nia nebe nia sura mak item sira (line item budgeting), la os hare ba iha programa (program budgeting). Estrutura Orsamentu Estadu agora nebe halu klasifikasaun ba iha kategoria hat (salariu vensimentu, bens servisu, transferensia publika, kapital ho dezenvolvimentu) simples tebes tanba ita bele aloka osan tuir kategoria hat née. Fasil atu aloka osan, fasil atu hatun ka hasae osan, fasil atu ezekuta osan. Maibe item sira née la hatudu ninia ligasaun ho objetivu orsamentu nia, hanesan aloka osan atu hasae kresimentu ekonomiku persentagem hira, loke servisu hira, iha setor ida nebe, hamenus kiak hira, ho objetivu too ona ka seidauk. Frakesa ida tan mak kategoria tolu dahuluk (salariu vensimentu, bens servisu, ho transferensia publika), ita temi rekurenti hotu bainhira servisu balu iha laran neba lolos ba dezenvolvimentu nia. Nebe tinatinan ita aumenta osan mos, ita hare ba iha rekurenti mak sae makas bainhira osan balu ba iha dezenvolvimentu nia.

Foin dadauk iha orsamentu 2014 née mak komesa iha hanoin atu muda maibe mudansa kiik oan deit. Presiza mudansa substantivu atu dudu prosesu dezenvolvimentu née programatiku ho planeadu. Iha estrutura orsamentu Estadu line item budgeting née, so despesa fisika hanesan ponte, estrada, uma ho portu aeroportu mak dehan kapital ho dezenvolvimentu bainhira servisu seluk hanesan rekruta tan ema atu halu servisu ba tinan ida deit mos lolos tama ba kategoria dezenvolvimentu. Maibe ita hatama ba iha rekorenti (rutin) bainhira servisu née halao tinan ida deit para ona. Fo subsidiu ba ema ruma iha tinan ida deit lolos mos halu parte dezenvolvimentu maibe dehan katak née parte transferensia publika, nebe despesa née rekorenti mesmu ke tinan oin née despesa née la iha ona. Frakesa ida tan line item budgeting née mak virement (muda orsamentu tun sae) atu hadau ezekuta lalais. Se lae tinan oin alokasaun orsamentu tun ona. Nebe muda orsamentu hosi item ida (ke importante) ba item seluk (nebe la importante) tanba lei orsamentu fo dalan. Naran katak bele ezekuta hotu tinan ida née nia laran ho tinan seluk husu tan. Se bele hasae barak liu tan. Tanba née dala barak too tinan fiskal ramata, ita hare ezkusaun 100% mas resultadu ita la hetan barak tanba ita muda tun muda sae tiha ona. Virement née bele halao too 20% orsamentu orsamentu Estadu nia, naran katak keta book salariu vensimentu ho kapital ho dezenvolvimentu tuir Lei No. 9/2009 konaba Orsamentu ho Gestao Finanseira. Tanba moras virement née ho kahur orsamentu dezenvolvimentu, rekorenti ho kapital née halakon tiha ligasaun ba iha objetivu nebe atu atingi. Iha diskusaun konaba Orsamentu Estadu nia ida, Diretor Geral ida hamrik ho ran nakali hatete, "Ami nia orsamentu née imi tetak rahu-rahun tiha, agora imi husu ba ami konaba objetivu programa too ka lae, ami hare oinsa?" Ema hotu hateke ba malu, maibe koitadu sala la os Ministeriu Finansa nia maibe estrutura orsamentu line item budgeting eransa UNTAET née mak sala. Tanba née presiza reforma orsamentu estadu.

Ita bele komprende tanba sa mak UNTAET adopta orsamentu line item budgeting née, tanba osan hosi doador. Doador sira husu atu ezekuta lalais hanesan kondisaun atu hetan tan ajuda. Maibe tempu too ona pratika ida née ita muda atu kontrola diak liu destinu dezenvolvimentu nasional Timor-Leste nia atu too mehi sira iha PED 2011 - 2030 nia.

Muda oinsa? Muda ba Program Budgeting ka orsamentu nebe orienta ba programa duke orsamentu line item budgeting nebe hamosu destinu nasaun nian maka inefisiensia, korupsaun, ho resultadu minimu. Program budgeting née atu ita halu orsamentu orienta ba programa. Defini lolos objetivu performansia espesifiku hodi aloka orsamentu ba. Programa sira labele habit malu (tumpang tindih) hosi Ministeriu ida ba Ministeriu seluk ka diresaun ida ho diresaun seluk. Nune mos ita minimiza duplikasaun sira nebe ita hare barak la halimar, la os deit iha orsamentu maibe mos iha disain estrutura Governu nia ho birokrasia Timor-Leste durante tinan hirak née. Program budgeting née, presiza planu forti hodi kordena entre Ministeriu sira ho distritu sira atu hamosu programa ho resultadu ida ke defini tiha ona ba benefisiu ema barak nia.

Mesmu ke komplikadu liu line item budgeting, tempu too ona ba Timor-Leste atu halao reforma orsamentu Estadu nia hodi benefisia ba ema barak, loke servisu, hamenus desikilibriu regional, hamenus korupsaun, hasae rendimentu ho industrializa lalais Timor-Leste. Mehi Timor-Leste atu sai tuir Singapura sei la too bainhira ita sei uza line item budgeting nebe determina ita nia destinu ba inefisiensia ho korupsaun tanba dudu deit atu ezekuta lalais hodi hetan tan fali aloksaun osan foun mesmu ke resultadu despesa bot hirak née minimu tebes.

Implikasaun hosi Program Badgeting née maka restrutura Governu, reestrutura birokrasia, ho hametin planeamentu hodi responde ba programa sira nebe hadia povu nia moris. Hamenus programa sira nebe la iha objetivu konkretu, habit malu, ho hamosu deit korupsaun. Tinan-tinan ita halu evaluasaun konaba programa sira née ho hadia mesmu ke programa balu tenki husik tanba nesesidade nasional la os ona hanesan iha momentu ita hamosu programa ida née.

Ikus liu, hanoin hirak née atu kontribui ba hadia situasaun Timor-Leste nia liliu maneja didiak prosesu eleitoral, ekonomia liliu orsamentu atu too ba iha moris diak (prosperidade) povu nia. Nune ita bele realiza mehi self determination tuir espiritu espresaun popular referendum nia.

Parabens ba Povu Timor-Leste ba loron istoriku ho loron self determination, 30 Augustu 2014.